Kategoriseer oortredings in die werksplek

Die dissiplinêre kode is ‘n riglyn vir werknemers om hulle in kennis te stel van wat as onaanvaarbare gedrag in die werksplek beskou word en te verseker dat dissiplinêre aksies redelik, konsekwent en regverdig toegepas word.

Hoofdoel van die dissiplinêre kode

Die hoofdoel van die dissiplinêre kode is om orde en dissipline binne die werksomgewing te handhaaf deur middel van billike en konsekwente prosedures. Dit sluit die volgende aspekte in:

• Handhaaf van dissipline: Die werkgewer streef daarna om dissipline op ‘n regverdige manier te handhaaf met ‘n fokus op progressiewe dissipline.
• Voorkom onaanvaarbare gedrag: Die kode is daarop gemik om onaanvaarbare gedrag van werknemers te voorkom.
• Verander gedrag: Deur positiewe invloed moet werknemers aangespoor word om hul gedrag aan te pas.
• Maksimaliseer produktiwiteit: Die uiteindelike doel is om produktiwiteit in die werksplek te verbeter.

Beginsels

Goeie beginsels in die dissiplinêre kode sluit in:

• Verantwoordelikheid: Dissipline is die werkgewer se verantwoordelikheid en moet deur toesighouers en bestuur uitgevoer word.
• Redelikheid: Dissiplinêre optrede moet redelikerwys gegrond wees op die erns van die oortreding en die werknemer moet bewus wees van die werkgewer se verwagte standaard.
• Geleentheid om te appèlleer: Dit is prakties om in die dissiplinêre kode voorsiening te maak daarvoor dat werknemers die geleentheid het om teen enige sanksie appèl aan te teken.
• Verteenwoordiging: Werknemers het die reg om interne verteenwoordiging te versoek tydens dissiplinêre verhore.

Dissiplinêre sanksies

Die dissiplinêre kode bied riglyne vir die hantering van dissiplinêre optrede, met ‘n klem op progressiewe dissipline. Dit sluit die volgende soorte sanksies in:

• Mondelingse waarskuwings: Hierdie tipe waarskuwing is gewoonlik geldig vir ‘n korter periode, soos byvoorbeeld drie maande, en word uitgereik vir eerste oortredings of minder ernstige wangedrag.
• Skriftelike waarskuwings: Hierdie waarskuwings word uitgereik wanneer mondelingse waarskuwings ontoereikend is, of vir meer ernstige oortredings. Dit is meer ernstig as ‘n mondelingse waarskuwing en is ook gewoonlik geldig vir ‘n langer periode, soos byvoorbeeld ses maande.
• Ernstige skriftelike waarskuwings: Hierdie waarskuwings word gegee vir herhaalde oortredings of vir meer ernstige wangedrag. Die waarskuwing is meer ernstig as ‘n skriftelike waarskuwing en is ook gewoonlik geldig vir ‘n langer periode, gewoonlik omtrent byvoorbeeld ses maande.
• Finale skriftelike waarskuwings: Hierdie waarskuwings word gegee vir herhaalde oortredings of vir baie ernstige wangedrag en dui aan dat die volgende oortreding kan lei tot ‘n dissiplinêre verhoor. Die waarskuwing is meer ernstig as ‘n ernstige skriftelike waarskuwing en is ook gewoonlik geldig vir ‘n langer periode, gewoonlik omtrent byvoorbeeld 12 maande.
• Ontslag: Ontslag moet altyd die laaste opsie wees, of vir gevalle van uiterste ernstige wangedrag, wat ‘n breuk in die vertrouensverhouding tussen die werkgewer en werknemer veroorsaak. Ontslag kan nie sonder ‘n dissiplinêre verhoor uitgevoer word nie, omrede die verhoor verseker dat ‘n billike prosedure gevolg word en bevestig die substantiewe rede vir ontslag. Ontslag is gepas wanneer ‘n geldige finale skriftelike waarskuwing vir soortgelyke wangedrag steeds onvoldoende was om te lei tot gedragsverbetering.

Kategorisering van oortredings

Soms is dit meer gebruikersvriendelik om die dissiplinêre kode in verskeie kategorieë in te deel deur soortgelyke oortredings te groepeer. Algemene kategorieë sluit in:

• Kategorie 1: Afwesigheid – Oortredings wat kan lei tot dissiplinêre optrede, waar werknemers nie teenwoordig is volgens hul gekontrakteerde en of geskeduleerde werksure nie.
• Kategorie 2: Kontrole by die werk – Werknemers moet die werkgewer se reg om kontrole uit te oefen erken. Dit sluit in die gehoorsaamheid aan reëls en die behoorlike gebruik van die werkgewer se eiendom.
• Kategorie 3: Industriële aksie – Die reg om te staak word beskerm, maar moet binne die wetlike raamwerk uitgevoer word. Onbeskermde stakings kan dissiplinêre gevolge hê.
• Kategorie 4: Wanordelike gedrag – Wanordelike gedrag kan die werksplek se produktiwiteit en veiligheid negatief beïnvloed. Werknemers moet redelike instruksies nakom.
• Kategorie 5: Diefstal of bedrog – Die diensverhouding is gebaseer op vertroue. Ernstige oortredings, soos diefstal, kan lei tot onmiddellike ontslag.

Die dissiplinêre kode is ‘n noodsaaklike instrument vir die bestuur van gedrag in die werksplek. Dit waarborg dat alle werknemers regverdig behandel word terwyl daar ‘n struktuur bestaan om onaanvaarbare gedrag te hanteer. Deur ‘n progressiewe benadering te volg, kan werkgewers en werknemers saamwerk om ‘n produktiewe en harmonieuse werksomgewing te skep.

Kontak die LWO– vir enige advies of bystand!

Nog nie ‘n LWO lid nie? Kyk na ons lidmaatskap opsies.